Ez da duela berrogoi urte egiten zen bezalako gerlaren aurkako artikulu bat gaur datorrena, baizik eta Patrick Dallenes Baionako suprefetak BERRIAn, uztailaren 4 ean egin duen deklarapenari buruzko kritika bat. Prefetaren esanetan bakearen arazoa Espainiako Estatuan daiteke bakarrik, han gerla izan zelako berrogoi ta hamar urtetan zehar, bainan Iparraldean dana “baketsua” izan da. Herri baten suntsitzeko gerlak itxura asko badituela ez daki edo ez du jakin nahi Baionako suprefetak.
Historia modernoari bagagozkiola, Louis XIV erregeak absolutismu hutsan iharduten hasi zuelarik, urratsez urrats aritu zen Frantziako erresuma Iparraldeko Euskal Herria zapaltzen, foruen murriztzen, eta Frantziako Iraultza jakobinistak azken golpea eman zien Iparraldeko erakundeeri. Garai honetatik honera etengabe izan da Euskal Herriko departamentu baten alde eskaera, gobernu guztiek aitzaki faltsuez beti ukatu zutena. Gaur ere errebendikapen hori segitzen ari da, bainan ez jakina edo elkorra egiten du Frantziako gobernuak. Beraz aspalditik irauten du Euskal Herriaren aurkako Parisetik zuzenduriko erakundeen gerla.
Frantziako iraultzatik hasi zen ere gerla kulturala, euskeraz debekatuz; fanatismoaren hizkuntza zelakoan suntsitu beharra zen herriko mintzaira. XIX garren mendean jarraitu zuen gerla kultural horrek, “Frantziaren hizkuntza batasunaren izenean euskara desagertu beharra zela” eta “frantsesa zabaldu behar zela behemailako arrazak zibilizatzeko” lemenpean. XX garren eta XXI garren mendeetan badirau gerla horrek Baionako suprefetak berak Hendaian ikastola berri baten eraikitzea debekatzen duelarik, eta Euskeraren koofizialtasunaren aurka agertzen zaikularik. Beraz itxuraz aldatzen bada ere, gerla kulturalan darrai Frantziak Euskal Herriaren kontra.
Euskal herritarren kontrako erasoak era askotakoak izan dira azken berrehun urteetan. Iraultzaren garaietan Iparraldeko herritar asko herbesteratu zituzten Kaskoinako Landeetako herrietara, eta kaskoinez ordezkatu “Frantzia egiteko” omen. Azkenik ez da Jugoslabia ohian sortu gaur salhatzen den “garbiketa ethnikoa.”
Abertzaletasun modernoa agertu zelarik, ez da sekulan gelditu militanteen kontrako zapalkuntza: Iparraldeko militante baketsuen atxilotzea, Espainia frankistatik ihes egindako lehen ETAkideak herbesteratzea; “terrorismoaren aurkako neurriak” zirela ez bezate esan, 1968 garren urtean baino lehenago ez baitzuen ETAk nihor erahil. Gero izan dira Espainia eta Frantziaren arteko “terrorismoaren aurkako neurriak”; GAL erakunde hiltzailearen bitartez Espainiako Gobernu sozialistak muntaturiko xantaiaren ondorioz Iparraldean zeuden ihesle asko estraditatu du Frantziako Gobernuak, bedi eskuin bedi esker aldekoa.
Ondorioz gezurretan eta hipokrisia hutsean ari zaiku Baionako suprefeta aldarrikatzen duelarik gerlan ez dela Frantzia sekulan Euskal Herriaren aurka ibili. Frantziako Estatuan ehun euskal preso politikarik badaudela ahantzi duke ere.
AHOAN BILORIK GABE:Patrick Dallennes – Bake-prozesua (2.partea)
« Ahoan bilorik gabe » Iparraldeko euskal hedabideek proposatzen dugun hilabeteroko hitzordua da. Herria astekariak, Euskal Irratiak, Hitza Berria egunkariaren Iparraldeko gehigarriak,Kazeta.infok eta Kanaldudek elgarrekin galdezkatu dugu Patrick DALLENNES Baionako Suprefeta oren batez “Ahoan bilorik gabe”, émission d’actualité proposée par les médias basques d’Iparralde. Invité: le sous-préfet de Bayonne Patrick Dalennes